Канон мученицам Вере, Надежде, Любови и матери их Софии
Глас 1
Песнь 1
Ирмос: Твоя́ победи́тельная десни́ца/ боголе́пно в кре́пости просла́вися./ Та бо, Безсме́ртне,/ я́ко всемогу́щая, проти́вныя сотре́,// изра́ильтяном путь глубины́ новосоде́лавшая.
Припев: Святи́и му́ченицы, моли́те Бо́га о на́с.
Преми́рныя Твоея́, Христе́,/ и несказа́нныя прему́дрости осия́ние да́руй мне, Влады́ко,/ благоле́пныя и благосла́вныя Твоея́ му́ченицы,/ я́ко да воспою́ Софи́ина прозябе́ния.
Припев: Святи́и му́ченицы, моли́те Бо́га о на́с.
Нарица́ние твое́ я́ве жи́тельством, богому́драя, украси́ся:/ всю бо проводи́ла еси́ жизнь твою́ прему́дрости жела́нием, сла́вная Софи́е,/ му́дрости осия́вшися благода́тию.
Припев: Святи́и му́ченицы, моли́те Бо́га о на́с.
Твой всеблаже́нный плод,/ Пребоже́ственныя Тро́ицы количеством украша́емь,/ страда́льчески за о́ную подвиза́ся, всему́драя Софи́е,/ Прему́дрости Боже́ственныя тезоимени́тая.
Сла́ва Отцу́ и Сы́ну и Свято́му Ду́ху.
Те́ло и ду́шу доброде́тельми очи́стивше,/ де́вы отрокови́цы три Тебе́ приведо́шася му́ченически,/ у́мному Жениху́ Христу́,/ Ве́ра с Наде́ждею и Любо́вь сла́вная.
И ны́не и при́сно и во ве́ки веко́в. Ами́нь.
Богородичен: Весь зрак мой прии́м, Иже во зра́це Бо́жии пре́жде зримь,/ всего́ обнови́, в Твое́м чре́ве боголе́пно всели́вся, Пречи́стая./ Те́мже Богоро́дицу, ве́рнии, Тя вси сла́вим.
Песнь 3
Ирмос: Еди́не Ве́дый челове́ческаго существа́ не́мощь/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:// одушевле́нный Хра́ме неизрече́нныя сла́вы Твоея, Человеколюбче.
Припев: Святи́и му́ченицы, моли́те Бо́га о на́с.
Гла́са послу́шавше Христо́ва,/ зову́ща к безсме́ртней и безстра́стней жи́зни,/ после́доваша венцено́сицы де́вы и му́ченицы,/ е́же вопи́ти Тебе́, Святы́й:/ Хра́ме одушевле́нный пречи́стыя сла́вы Твоей, Человеколю́бче.
Припев: Святи́и му́ченицы, моли́те Бо́га о на́с.
Кре́пость дарова́ Христо́с/ стоя́щим пред суди́щем му́ченически вам, я́ко обеща́ся,/ и богодохнове́нныя му́дрости испо́лни,/ и све́тлы показа́ победоно́сныя му́ченицы,/ де́вства сия́юща благода́тию.
Припев: Святи́и му́ченицы, моли́те Бо́га о на́с.
Притупи́сте ум вра́жий, де́вы, великохва́льный/ и того́ горды́ню низложи́сте,/ великому́дренно подви́гшеся,/ и пре́жде хва́лящагося истреби́ти мо́ре/ тече́ньми крове́й потопи́сте.
Сла́ва Отцу́ и Сы́ну и Свято́му Ду́ху.
Му́дрости вы́шния Христо́вы бога́тно насы́тившеся,/ избра́нныя му́дрости и благоу́мныя,/ дще́ри три посрами́ша му́чащих свире́пства и неи́стовство неде́ржное,/ вити́йствующе Боже́ственная уче́ния.
И ны́не и при́сно и во ве́ки веко́в. Ами́нь.
Богородичен: Святы́х Свята́го Христа́ свя́то породила́ еси́,/ Святы́ни свято́е селе́ние,/ во святы́х почива́ющаго,/ Ему́же вопие́м: свят храм одушевле́нный/ неизрече́нныя сла́вы Твоей, Человеколю́бче.
Седален, глас 1
А́гницы слове́сныя А́гнца и Па́стыря,/ огню́ и лю́тым му́кам пре́дани бы́сте/ и яви́стеся А́нгелом равноче́стни./ Тем вси свяще́нную ва́шу па́мять пра́зднуем в весе́лии се́рдца, де́вы богому́дрыя.
Песнь 4
Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́йте Свято́му, // во спасе́ние на́ше и обновле́ние.
Припев: Святи́и му́ченицы, моли́те Бо́га о на́с.
Укре́пльшеся Боже́ственною благода́тию, добропобе́дныя,/ Ве́ра, Любо́вь и Наде́жда/ мучи́телей преще́ния му́жественно посрами́ша,/ огне́м всесожега́емы, всему́дрыя,/ и Жениху́ Христу́ приводи́мы.
Припев: Святи́и му́ченицы, моли́те Бо́га о на́с.
Возмого́ша, Креста́ всеору́жием огради́вшеся,/ Ве́ра, Любо́вь и Наде́жда/ муче́ний благомо́щно ра́ны стерпе́ти, святы́я,/ да́же до кро́вей крепча́йше ко греху́ проти́вльшеся.
Сла́ва Отцу́ и Сы́ну и Свято́му Ду́ху.
Свещи́ тричи́сленныя му́дрости сия́ющия,/ Ве́ра, Любо́вь и Наде́жда,/ Тро́ицы просвеще́ньми я́ве блиста́ющияся,/ пресве́тло Це́ркви просвеща́ют,/ ко спасе́нию на́шему и защище́нию.
И ны́не и при́сно и во ве́ки веко́в. Ами́нь.
Богородичен: Святы́х Свята́я Богоро́дице Всепе́тая,/ ожида́ние язы́ков и спасе́ние ве́рных,/ из Тебе́ возсия́ Изба́витель и Жизнода́вец и Госпо́дь,/ во спасе́ние нас, пою́щих Тя.
Песнь 5
Ирмос: Просвети́вши сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ богоразу́мия// правосла́вно пою́щих Тя.
Припев: Святи́и му́ченицы, моли́те Бо́га о на́с.
Терпе́нием мудрова́ний му́ки подъе́мляху,/ и му́дрости, су́щия в Бо́зе, глаго́люще та́йны,/ держа́щаго посрами́ша три де́вы богоно́сныя,/ ве́рою и естество́м связу́емы.
Припев: Святи́и му́ченицы, моли́те Бо́га о на́с.
Ра́дуется прама́ти, ви́дящи побежда́ема льсти́ваго,/ из Еде́ма дре́вле изгна́вшаго сию́,/ жена́ми богому́дрыми,/ Наде́ждою, Ве́рою и Любо́вию, Софи́и рожде́ньми.
Сла́ва Отцу́ и Сы́ну и Свято́му Ду́ху.
Ядови́таго мучи́телева ласка́ния избего́ша/ и муче́ний я́звы во́льне претерпе́ша честны́я отрокови́цы,/ Твое́ю любо́вию уя́звльшеся, Христе́,/ и Боже́ственным Твои́м раче́нием.
И ны́не и при́сно и во ве́ки веко́в. Ами́нь.
Богородичен: Веселя́тся Небе́сныя Си́лы, ви́дяще Тя,/ ра́дуются с ни́ми челове́ков состоя́ния:/ Рождество́м бо соедини́шася Твои́м, Де́во Богоро́дице,/ Его́же досто́йно сла́вим.
Песнь 6
Ирмос: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния,/ спаси́ лю́ди Твоя́, Бо́же наш:// Ты бо кре́пость немощству́ющих и исправле́ние.
Припев: Святи́и му́ченицы, моли́те Бо́га о на́с.
Ра́дующеся,/ во Твои́, Влады́ко, пречи́стыя дла́ни/ возложи́ша наде́жды отрокови́цы три,/ Тро́ицы коли́чеством и число́м почте́нныя/ и похваля́емыя.
Припев: Святи́и му́ченицы, моли́те Бо́га о на́с.
Светя́щеся де́вства добро́тами,/ му́ченическими увязе́ньми украси́шася,/ и вене́ц сугу́б свы́ше досто́йне прия́ша/ от Христа́, Жизнода́вца и Всеще́драго.
Сла́ва Отцу́ и Сы́ну и Свято́му Ду́ху.
Приведо́шася, Влады́ко, в храм Твой, всех ца́рствующаго,/ де́вственная сокро́вища честна́я/ приобщи́тися Ца́рствию Твоему́:/ Ты бо тех и свет еси́, и весе́лие.
И ны́не и при́сно и во ве́ки веко́в. Ами́нь.
Богородичен: Ра́дуются о Тебе́, Де́во Пречи́стая,/ ро́да на́шего пра́отцы,/ Еде́м восприе́мше Тобо́ю,/ его́же преступле́нием погуби́ша:/ Ты бо Чиста́ и пре́жде Рождества́, и по Рождестве́ еси́.
Кондак, глас 1
Софи́и честны́я свяще́ннейшия ве́тви/ Ве́ра и Наде́жда и Любо́вь показа́вшеся,/ му́дрость обуи́ша е́ллинскую благода́тию,/ и пострада́вше, и победоно́сицы яви́вшеся,/ венце́м нетле́нным от всех Влады́ки Христа́ увязо́шася.
Песнь 7
Ирмос: Тебе́ у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́ во чре́ве Твое́м всеце́л// хва́льный отце́в Бог и препросла́влен.
Припев: Святи́и му́ченицы, моли́те Бо́га о на́с.
Трисия́нною еди́нства благода́тию озаря́еми я́ве, де́вы/ де́монское разруши́ша тьмонеи́стовство,/ Свет Триипоста́сный богосло́вяще и пою́ще:/ хва́льный отце́в Бог и препросла́влен.
Припев: Святи́и му́ченицы, моли́те Бо́га о на́с.
На Небесе́х черто́ги иму́ще, свещено́сныя ду́ши,/ со А́нгелы ве́село ны́не ликовству́ете,/ сла́ву присносу́щную зря́ще и глаго́люще:/ хва́льный отце́в Бог и препросла́влен.
Сла́ва Отцу́ и Сы́ну и Свято́му Ду́ху.
Терпели́во, я́ко о́троцы, противле́ние показа́вше,/ огнь попра́ша му́жественно:/ тех бо равночи́сленныя/ ра́зум равноста́тный богоно́сныя стяжа́ша,/ хва́льнаго отце́в при́сно Бо́га и препросла́вленнаго.
И ны́не и при́сно и во ве́ки веко́в. Ами́нь.
Богородичен: Дае́ши, Чи́стая, оставле́ние прегреше́ний воспева́ющим Тя ве́рно,/ избавля́ющи напа́стей и вся́каго обстоя́ния:/ Тя бо ны́не стяжа́хом прибе́жище, Богоневе́стная,/ я́ко хва́льнаго отце́в Бо́га рука́ми носи́вшая.
Песнь 8
Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисто́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.
Припев: Святи́и му́ченицы, моли́те Бо́га о на́с.
Де́вы богосве́тлыя, Ве́ра, Наде́жда, Любо́вь,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Припев: Святи́и му́ченицы, моли́те Бо́га о на́с.
Сия́ющия и светови́дныя муче́нием проявле́нно бы́вшия де́вы,/ ве́рнии, воспои́м, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Сла́ва Отцу́ и Сы́ну и Свято́му Ду́ху.
Враче́вств струю́ оби́льно, дово́льно и бога́тно/ ра́ки страстоте́рпиц источа́ют при́сно, ве́рою зову́щим:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
И ны́не и при́сно и во ве́ки веко́в. Ами́нь.
Богородичен: Земля́ свята́я была́ еси́, Чи́стая, жизноно́сный Клас ро́ждшая,/ присносу́щныя жи́зни Хода́тая, Христа́,/ Ему́же вси зове́м:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Песнь 9
Ирмос: О́браз чи́стаго Рождества́ Твоего́/ огнепали́мая купина́ показа́ неопа́льная, / и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,// непреста́нно велича́ем.
Припев: Святи́и му́ченицы, моли́те Бо́га о на́с.
Све́том Трисия́нным исполня́еми и сия́ния Боже́ственнаго ны́не насыща́ющеся,/ купноиме́нныя доброде́телей/ и тождеиме́нныя любве́, наде́жди и ве́ры,/ наде́ждею и любо́вию ны и ве́рою утверди́те.
Припев: Святи́и му́ченицы, моли́те Бо́га о на́с.
Да вы́шняя Кре́пость ны́не укроти́т обдержа́щую бу́рю е́реси,/ о страстоте́рпицы непобеди́мыя,/ и пода́ст ве́рным единоу́мие,/ проси́те, мо́лим непреста́нно, доброде́вы.
Сла́ва Отцу́ и Сы́ну и Свято́му Ду́ху.
Нощь жития́, всему́дрыя, преше́дше, день постиго́сте невече́рний,/ му́ченически веселя́щеся/ и де́вственно хва́лящеся благода́тию,/ и Божественнаго Ца́рствия нетленнаго сподобля́емы.
И ны́не и при́сно и во ве́ки веко́в. Ами́нь.
Богородичен: О, ка́ко Де́ва роди́ присносу́щее Сло́во и Ипоста́сное,/ Сия́ние о́тчия Ипоста́си,/ на́шего Благоде́теля и Го́спода, из Нея́ вопло́щшася,/ Его́же досто́йно велича́ем.
Акафист мученицам Вере, Надежде, Любови и матери их Софии
Конда́к 1
Избра́нным раба́м Го́спода Вседержи́теля, Ве́ре, Наде́жде и Любви́, и му́дрей ма́тери Софи́и, похва́льная вам пе́ния умиле́нно возно́сим. Вы же, я́ко дерзнове́ние ко Христу́ Бо́гу иму́ще, моли́тися за ны, во е́же изба́витися нам грехо́в и скорбе́й, да благода́рственно вопие́м вам:
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
И́кос 1
А́нгели на Небеси́ ра́довахуся, доброде́тельное житие́ ва́ше зря́ще, е́же провожда́сте в чте́нии Писа́ний Боже́ственных, в труде́х, посте́, моли́тве и ми́лостыни, ма́терию ва́шею непреста́нно су́щи поуча́еми, да явите́ся о́брази живи́и трие́х богосло́вских доброде́телей, и́хже имена́ми наречены́ бы́сте. Мы же, такове́й му́дрости ма́тере ва́шея и соверше́нному благоразу́мию ва́шему дивя́щеся, благогове́йно рцем вам:
Ра́дуйтеся, единомы́сленныя сестры́, трие́м доброде́телем тезоимени́тыя; ра́дуйтеся, в повинове́нии богому́дрей ма́тери ва́шей на сте́пени соверше́нствования вше́дшия.
Ра́дуйтеся, а́ки три ра́йския ве́тви, в злове́рнем Ри́ме возра́сшия; ра́дуйся, Софи́е, дще́рем твои́м имена́ доброде́телей наре́кшая, я́же ве́щию исполня́ти научи́ла еси́.
Ра́дуйся, Ве́ро, ве́рою неви́димое, я́ко ви́димое, зре́ти нам помога́ющая; ра́дуйся, в нетле́ние облече́нная.
Ра́дуйся, Наде́ждо, наде́ждою страда́ния на́ша во юдо́ли ско́рби ослабля́ющая и в го́рняя десни́цею указу́ющая; ра́дуйся, Ца́рствие Небе́сное унасле́довавшая.
Ра́дуйся, Любы́, любо́вию Боже́ственною блаже́нство безсме́ртныя жи́зни нам открыва́ющая; ра́дуйся, благода́тию Ду́ха Свята́го осия́нная.
Ра́дуйся, Софи́е, си́есть прему́дрость, прему́дре дще́ри твоя́ воспита́вшая; ра́дуйся, в доброде́телех ве́ры, наде́жды и любве́ нас утвержда́ющая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 2
Ви́дящи му́драя Софи́я слуги́, прише́дша зва́ти ю со дще́рьми ко царю́ Адриа́ну, и позна́вши вину́ призва́ния своего́, ста со ча́ды свои́ми на моли́тву, по́мощи Бо́га прося́щи. По моли́тве же, е́мшеся за ру́це, я́коже вене́ц уплете́нный, идя́ху вку́пе, пою́ще Христу́ Бо́гу: Аллилу́иа.
И́кос 2
Ра́зум несумне́нный име́ли есте́, святы́я, егда́ бо в пала́ты ца́рския введены́ бы́сте, царе́ви Адриа́ну предста́сте с лице́м све́тлым, очесы́ весе́лыми и се́рдцем му́жественным. Царь же, зря честна́я лица́ ва́ша неустраше́нна и му́дрость Софи́и уве́дев, отложи́ на и́но вре́мя суд свой и отсла́ вы к не́коей благоро́дней жене́, у нея́же пребы́сте три дни, ма́тери ва́шей прему́дрей богодухнове́нными словесы́ день и нощь вас поуча́ющей. Те́мже ублажа́юще вас, взыва́ем си́це:
Ра́дуйтеся, три непоро́чныя а́гницы Христо́вы, вене́ц доброде́телей в себе́ совокупи́вшия; ра́дуйтеся, три доброде́тельныя сестры́, тве́рдую ве́ру, несумне́нную наде́жду и нелицеме́рную любо́вь ко Го́споду Бо́гу яви́вшия.
Ра́дуйтеся, не пощади́вшия красоты́ и мла́дости ва́шея, Красне́йшаго ра́ди добро́тою па́че сыно́в челове́ческих; ра́дуйся, Софи́е, ча́да твоя́ возлю́бленная на по́двиг му́ченический за Христа́ наставля́вшая.
Ра́дуйся, Ве́ро, муче́нием за Христа́ ве́ру твою́ испове́давшая; ра́дуйся, сестры́ твоя́ кре́пкою ве́рою воздвиза́вшая.
Ра́дуйся, Наде́ждо, тве́рдое наде́яние на Христа́ возлага́вшая; ра́дуйся, сестры́ твоя́ неосла́бною наде́ждою укрепля́вшая.
Ра́дуйся, Любы́, му́ками за Христа́ любо́вь твою́ де́йственную показа́вшая; ра́дуйся, сестры́ твоя́ огне́м любве́ огражда́вшая.
Ра́дуйся, Софи́е, сла́дкая ча́да твоя́ увещава́вшая презре́ти сла́ву и бога́тство и всю сла́дость ми́ра сего́ тле́ннаго; ра́дуйся, до́брыя дще́ри твоя́ до кро́ве ста́ти за Го́спода и умре́ти за Него́ усе́рдно учи́вшая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 3
Си́лою Боже́ственною осенены́ бя́ху му́ченицы, я́же доброде́тели име́н свои́х яви́ша де́лом в по́двизех му́ченических, воспева́юще Бо́гу: Аллилу́иа.
И́кос 3
Иму́ще в себе́ святы́я му́ченицы столп ве́ры, криле́ наде́жды и огнь любве́, в сла́дость послу́шающия от слове́с ма́тере своея́, еди́на другу́ю в долготерпе́нии утвержда́ху и ра́достно идя́ху, жела́юще честна́го му́ченичества, е́же за Христа́. Тому́ покланя́ющеся, я́ко Бо́гу на́шему, сицевы́ми вас воззва́ньми почита́ем:
Ра́дуйтеся, ни ма́ло не поскорбе́вшия о лише́нии вре́меннаго сего́ живота́ ве́чныя ра́ди жи́зни; ра́дуйтеся, че́сти ра́ди Христо́вы плоть на му́ки преда́вшия.
Ра́дуйтеся, три многоце́нныя сосу́ды ве́ры, наде́жды и любве́ Бо́гу в дар прине́сшия; ра́дуйся, Софи́е, я́ко, любве́ ра́ди презе́льныя ко дще́рям твои́м, всем се́рдцем возжеле́ла еси́, да Ца́рствие Бо́жие насле́дуют.
Ра́дуйся, Ве́ро, ду́ши на́ша ве́рою озаря́ющая; ра́дуйся, к ти́хому приста́нищу нас вознося́щая.
Ра́дуйся, Наде́ждо, сердца́ на́ша сла́достию наде́жды оживля́ющая; ра́дуйся, из пучи́ны отча́яния нас извлека́ющая.
Ра́дуйся, Любы́, страда́ния и ско́рби на́ша в ра́дость прелага́ющая; ра́дуйся, окамене́нная сердца́ на́ша во умиле́ние преводя́щая.
Ра́дуйся, Софи́е, му́дростию на благо́е нас наставля́ющая; ра́дуйся, потемне́нное о́ко душ на́ших просвеща́ющая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 4
Бу́ря я́рости мучи́телевы нападе́ на тя, свята́я Ве́ро, но не поколеба́ тя. Кто бо возмо́жет ве́ру неодоли́мую подви́гнути, адама́нта крепча́йшую, я́же ве́рных научи́ла есть пе́ти с тобо́ю Бо́гу: Аллилу́иа.
И́кос 4
Слы́шащи му́драя ма́ти дще́ри своя́ пред царе́м небоя́зненно Христа́ испове́дающия и глаго́лющия, я́ко того́ еди́наго жела́ют, е́же бы страда́ти и терпе́ти го́ркия му́ки сла́дкаго ра́ди Иису́са Христа́, ра́довашеся вельми́ и моля́ше Бо́га, да укрепи́т я в предлежа́щих му́ках. Сие́ у́бо изволе́ние похваля́юще, пе́рвейшей дще́ри му́дрыя ма́тере та́ко воспое́м:
Ра́дуйся, Ве́ро, немилосе́рдая бие́ния Сладча́йшаго ра́ди Иису́са сла́дце прие́мшая; ра́дуйся, уре́занная сосца́ твоя́, а́ки два кри́на чистоты́, в же́ртву Го́споду прине́сшая.
Ра́дуйся, я́ко от я́звы твоея́ вме́сто кро́ве млеко́ истече́; ра́дуйся, я́ко на раскале́нное желе́зо положе́на была́ еси́.
Ра́дуйся, я́ко в коно́б кипя́щ вве́ржена су́щи, ни ма́ло не опали́лася еси́, ниже́ вреди́лася еси́; ра́дуйся, пла́мень страсте́й на́ших небе́сною прохла́дою утиша́ющая.
Ра́дуйся, огнь муче́ний на́ших в боле́знех угаша́ющая; ра́дуйся, зна́мением ве́ры посреде́ напа́стей нас зна́менающая.
Ра́дуйся, щито́м ве́ры во бра́ни со враго́м нас покрыва́ющая; ра́дуйся, честну́ю главу́ твою́ за Главу́ Це́ркве, Христа́ Бо́га, под мечь ра́достно прекло́ншая.
Ра́дуйся, я́ко обагре́нием кро́ве твоея́, а́ки червлени́цею оде́яна, яви́лася еси́ очесе́м Безсме́ртнаго Жениха́ твоего́; ра́дуйся, к жела́нному кра́ю прише́дшая и люби́маго Спа́са и Го́спода узре́вшая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 5
Богозда́нным звезда́м уподо́билися есте́, Ве́ро, Наде́ждо и Любы́, всем бо се́рдцем прилепи́вшияся ко еди́ному ве́чному Животу́ и Красоте́ неизрече́нней, Иису́су Христу́, ско́ро ше́ствовасте, во е́же умре́ти за Него́ и наслади́тися Боже́ственнаго Его́ виде́ния, пою́ще Ему́: Аллилу́иа.
И́кос 5
Ви́девше добропобе́дныя сестры́ святу́ю Ве́ру ра́достно за Христа́ пострада́вшу, и са́ми хотя́ху ду́ши своя́ за Него́ положи́ти: царь же Наде́жду святу́ю нача́т испы́товати, и ви́дев ю с сестро́ю единомы́сленну су́щу, на му́ки вдаде́ ю, оба́че ничто́же успе́. Мы же, Наде́жду святу́ю о сицево́м ея́ мудрова́нии ублажа́юще, воспои́м и просла́вим ю́:
Ра́дуйся, Наде́ждо, жесто́ко бие́нная, оба́че пресве́тлую наде́жду на Го́спода не потеря́вшая; ра́дуйся, му́ки твоя́ безро́потно в молча́нии терпе́вшая.
Ра́дуйся, и нам кре́пкое терпе́ние подаю́щая; ра́дуйся, я́ко в разжже́нней пещи́ неопаля́ема бы́вши, хвалу́ Бо́гу возсыла́ла еси́.
Ра́дуйся, я́ко и нас во страда́ниих хвали́ти Бо́га науча́еши; ра́дуйся, я́ко ногтьми́ желе́зными стро́гана была́ еси́.
Ра́дуйся, нас, су́щих в ско́рбех, луча́ми наде́жды осиява́ющая; ра́дуйся, я́ко чу́дное не́кое благоуха́ние от язв твои́х исхожда́ше.
Ра́дуйся, непоколеби́мое упова́ние на Го́спода Иису́са неизме́нно сохра́ншая; ра́дуйся, безнаде́жность и безси́лие в сердца́х на́ших истребля́ющая.
Ра́дуйся, ме́чное посече́ние за Христа́ ра́достно прии́мшая; ра́дуйся, я́сная денни́це, нам, печа́льми земны́ми угнете́нным, мир ве́чный раскрыва́ющая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 6
Пропове́дником и апо́столом богоно́сным подо́бны бы́сте, богому́дрыя сестры́: доброде́тельми бо ва́шими пропове́дасте всем ве́рным ве́ру, наде́жду и любо́вь ко Го́споду, Влады́це всех, Тому́ пою́ще: Аллилу́иа.
И́кос 6
Возсия́ла еси́, а́ки со́лнце, Любы́ свята́я, кто бо си́це за возлю́бленнаго Го́спода своего́ можа́ше ста́ти, я́коже любы́, поне́же пи́сано есть: «Крепка́ я́ко смерть любы́, вода́ мно́га не мо́жет угаси́ти любве́, и ре́ки не потопя́т ея́». Мо́лим ти ся ны́не, Любы́ свята́я, серафи́мским пла́менем любве́ ко Го́споду горя́щая, обнови́ окамене́нная и изсо́хшая сердца́ на́ша, возжги́ в нас, оскуде́вших любо́вию, свет любве́, да возлю́бльше Го́спода и вся бли́жния на́ша, тебе́ я́ко моли́твенницу на́шу, восхва́лим си́це:
Ра́дуйся, Любы́, я́ко любве́ твоея́ ко Христу́ воды́ мно́ги пре́лестей мирски́х не угаси́ша; ра́дуйся, я́ко вся ласка́ния и да́ры царе́вы отве́ргши, ду́шу твою́ за Го́спода положи́ла еси́.
Ра́дуйся, я́ко любве́ твоея́ ре́ки бед и страда́ний не потопи́ша; ра́дуйся, за Го́спода Иису́са на колеси́ протя́гнутая, же́злием бие́нная, све́рдлами прободе́нная и в пещь о́гненную вве́рженная.
Ра́дуйся, я́ко в лю́тых му́ках твои́х си́лою Бо́жиею укрепля́ема была́ еси́; ра́дуйся, кро́вию твое́ю, любве́ ра́ди к Безсме́ртному Жениху́ твоему́ Христу́ излия́нною, в хла́дных сердца́х на́ших любо́вь возбужда́ющая.
Ра́дуйся, я́ве показа́вшая нам, я́ко любве́ ра́ди вся муче́ния сла́дце претерпева́ются; ра́дуйся, яви́вшая нам, я́ко любы́ Боже́ственная приво́дит к животу́ ве́чному.
Ра́дуйся, са́мою ве́щию уве́рившая, я́ко любы́ Боже́ственная открове́ние есть безсме́ртия; ра́дуйся, я́ко ника́яже мучи́тельства возмого́ша разлучи́ти Любо́вь от любве́ Христо́вы.
Ра́дуйся, в му́ках апо́стольски веща́вшая, я́ко не разлучи́т тя от любве́ Бо́жия ни скорбь, ни теснота́, ни гоне́ние, ни глад, ни нагота́, ни беда́, ни меч; ра́дуйся, любве́ ра́ди Христо́вы мече́м во главу́ усече́нная.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 7
Хотя́ще скоре́е от те́ла разлучи́тися и со Христо́м бы́ти, святы́я де́вы, егда́ на ме́чное посече́ние идя́ху, еди́на другу́ю и ма́терь свою́ Софи́ю объе́млюще лобыза́хуся, дру́жескому нас любле́нию поуча́юще, да вси ку́пно пое́м Бо́гу: Аллилу́иа.
И́кос 7
Но́вое чу́до показа́ Госпо́дь, егда́ по́мощь Свою́ посла́ страда́вшим за испове́дание и́мене Его́ толи́ко ю́ным де́вам: ве́рою бо, наде́ждою и любо́вию укрепля́емы и возноси́мы бы́вше, до́блественне по́двиги своя́ сконча́ша. Мы же в единомы́слии и единоду́шии до конца́ живота́ пребы́вших мо́лим вас, да и нам низпо́слете единомы́слие в соверше́нии до́брых дел, умиле́нно велича́ющим вас:
Ра́дуйтеся, Ве́ро, Наде́ждо и Любы́, еди́нем путе́м муче́ний до врат небе́сных ше́дшия; ра́дуйтеся, в пресве́тлый черто́г прелюбе́знаго Жениха́ ва́шего во гла́се ра́дования вше́дшия.
Ра́дуйтеся, я́ко Иису́с Христо́с просвети́, я́коже зве́зды на небеси́, ра́ны на телесе́х ва́ших; ра́дуйся, Софи́е, до́блественне на му́ки чад твои́х взира́вшая.
Ра́дуйтеся, я́ко небе́сною красото́ю, ея́же о́ко не ви́де, украси́ Госпо́дь добро́ту ва́шу, му́ками отъя́тую; ра́дуйтеся, венцы́ воздая́ния прие́мшия.
Ра́дуйтеся, а́ки три звезды́, Со́лнцем пра́вды озаре́нныя; ра́дуйся, Софи́е, в му́жественнем испове́дании дще́рьми твои́ми и́мене Христо́ва утеше́ние ве́лие обре́тшая.
Ра́дуйтеся, мглу сомне́ний на́ших разсеява́ющия; ра́дуйтеся, нас удруче́нных страда́ньми душе́вными и теле́сными, подкрепля́ющия.
Ра́дуйтеся, красото́ю любве́ сердца́ на́ша украша́ющия; ра́дуйся, Софи́е, кре́посте и утеше́ние изнемога́ющих в беда́х и ну́ждах.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 8
Стра́нное и непоня́тное нам немощны́м, в мирски́х сласте́х погря́знувшым, зрим де́ло, я́ко Софи́я свята́я, возлю́бленных чад свои́х ви́дящи лю́тыя и го́рькия му́ки и сме́рти, ни ма́ло не поскорбе́, но возра́довася зело́ ду́хом, пою́щи Бо́гу: Аллилу́иа.
И́кос 8
Вся бе в вы́шних му́драя Софи́я, егда́ дще́ри своя́ сла́дкими словесы́ и му́дрыми увеща́ньми на муче́ния подвиза́ше. А́ще же от естества́ к слеза́м преклоня́шеся а́бие, от любве́ Христо́вы прелага́шеся на ра́дость, печа́ль бо серде́чную и боле́знь о ча́дех ма́тернюю победи́ в ней любы́ Бо́жия. Ве́лиею у́бо любо́вию дще́ри своя́ лю́бящи, па́че всего́ тем Ца́рствия Небе́снаго жела́ше. Сего́ ра́ди, чудя́щеся му́дрости и вели́цей любви́ твое́й ко дще́рем и сла́вяще тя, взыва́ем:
Ра́дуйся, Софи́е, я́ко возвесели́ся душа́ твоя́ о блаже́нней кончи́не дще́рей твои́х, свято́е и́мя Го́спода дерзнове́нно испове́давших; ра́дуйся, в му́ченичестем венча́нии чад твои́х честь и сла́ву прия́вшая.
Ра́дуйся, уча́стия му́ченическаго и спребыва́ния со дще́рьми в небе́сней сла́ве Христа́ Бо́га сподо́бльшаяся; ра́дуйся, честна́я телеса́ дще́рей твои́х с ра́достными слеза́ми погре́бшая.
Ра́дуйся, три дни гро́бу их приседе́вшая и сном сме́рти о Го́споде почи́вшая; ра́дуйся, а́ще и не пло́тию, оба́че се́рдцем за Христа́ страда́вшая.
Ра́дуйся, я́ко три доброде́тельныя дще́ри, си́ми ве́ру, наде́жду, любо́вь к Бо́гу яви́вши, в дар Пресвяте́й Тро́ице принесла́ еси́; ра́дуйся, я́ко чадоро́дия ра́ди спасла́ся еси́.
Ра́дуйся, ди́вная ма́ти, благи́я па́мяти досто́йная; ра́дуйся, дще́ри твоя́, да кровь свою́ за Христа́ пролию́т, моли́вшая.
Ра́дуйся, умудря́ющая ны, да блюде́м непрело́жно доброде́тели ве́ры, наде́жды и любве́; ра́дуйся, Животворя́щей Тро́ице за ны моля́щаяся.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 9
Вси А́нгели дивля́хуся о страда́ниих ва́ших, святы́я му́ченицы, и побе́ду ва́шу над диа́волом торжеству́юще, ду́ши же ва́ша к Небеси́ провожда́юще, воспева́ху Христу́ Бо́гу: Аллилу́иа.
И́кос 9
Вити́и велере́чивии вся страда́ния ва́ша за Христа́ не возмо́гут изрещи́, дивя́щеся же толи́ким подвиго́м, во млады́х ле́тех подъя́тым, немо́тствуют. Мы же о честне́й кончи́не ва́шей Бо́га прославля́юще, велича́ем вас си́це:
Ра́дуйтеся, Ве́ро, Наде́ждо и Любы́, пою́щия хвалу́ Бо́гу, на не́бо небесе́ возше́дшему; ра́дуйтеся, щи́те ве́ры, броне́ наде́жды и свети́льниче любве́.
Ра́дуйтеся, зре́нием пресве́тлаго лица́ Бо́жия наслажда́ющияся; ра́дуйся, Софи́е, благочести́выя ма́тери на му́дрое воспита́ние чад их наставля́ющая.
Ра́дуйтеся, поуча́ющия ны, да взы́щем Го́спода, и жи́ва бу́дет душа́ на́ша; ра́дуйтеся, с ве́рою, наде́ждою и любо́вию прибега́ющих к вам те́плыя моли́твенницы.
Ра́дуйтеся, вразумля́ющия ны, я́ко вся сла́дость и пре́лесть ми́ра сего́ я́ко дым изчеза́ет, я́ко прах от ве́тра размета́ется и в персть обраща́ется; ра́дуйся, Софи́е, всем се́рдцем Го́спода Бо́га возлю́бльшая.
Ра́дуйтеся, а́ки трие́ све́тлии ключи́, ко еди́ному Исто́чнику жи́зни прите́кшии; ра́дуйтеся, а́ки трие́ благово́ннии цве́ти, на еди́ней благопло́дней ве́тви прозя́бшии.
Ра́дуйтеся, а́ки три зерца́ла, безпреде́льную красоту́ Бо́жию в себе́ отража́ющая; ра́дуйся, Софи́е, а́ки ма́слина, три ве́тви, отягче́нныя изоби́льными плоды́ даро́в Бо́жиих, произра́стшая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 10
Спасти́ хотя́ще ду́ши своя́ святы́я му́ченицы, любве́ ра́ди Христо́вы ласка́ния царе́ва и бога́тства ми́ра сего́ тле́ннаго презре́ша и ра́достно кончи́ну му́ченическую за Христа́ прия́ша, пою́ще Ему́: Аллилу́иа.
И́кос 10
Стена́ми ве́ры, наде́жды и любве́ явля́ются святы́я му́ченицы всем, прибега́ющим к ним с те́плою и усе́рдною моли́твою и си́це в печа́лех и напа́стех к ним взыва́ющим:
Ра́дуйтеся, язв грехо́вных до́брыя цели́тельницы; ра́дуйтеся, во тьме печа́ли на́шея све́том упова́ния ны озаря́ющия.
Ра́дуйтеся, посреде́ напа́стей и скорбе́й ди́вный поко́й нам посыла́ющия; ра́дуйся, Софи́е, о нас, в злострада́ниих пове́рженных, му́дрое попече́ние явля́ющая.
Ра́дуйся, Ве́ро, крест спасе́ния пред на́ми воздвиза́ющая; ра́дуйся, не́мощи на́ша по моли́твам к тебе́ изцеля́ющая.
Ра́дуйся, Наде́ждо, я́корь избавле́ния нам подаю́щая; ра́дуйся, уны́ние серде́ц на́ших бла́гостно отъе́млющая.
Ра́дуйся, Любы́, твои́м ко Го́споду хода́тайством в злей напа́сти от неча́янныя сме́рти ны огражда́ющая; ра́дуйся, изнемога́ющия си́лы на́ша на бо́дрость возставля́ющая.
Ра́дуйся, Софи́е, приле́жная о нас к Бо́гу моли́твеннице; ра́дуйся, в до́брех де́лех на́ших му́драя наста́внице.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 11
Пе́ние сие́ похва́льное, а́ще бы и тмочи́сленное приноша́хом вам, святы́я му́ченицы, не бы довле́ло ко прославле́нию доброде́телей и по́двигов ва́ших. Оба́че хвалу́ Бо́гу возсыла́юще за вся, я́же во святы́х Свои́х нам явля́ет, Тому́ пое́м: Аллилу́иа.
И́кос 11
Све́том небе́сным пред Го́сподем горя́щим свеща́м подо́бны Ве́ра, Наде́жда и Любы́, ку́пно с ма́терию их Софи́ею, к ни́мже припа́даем, моля́ще, да просветя́т ны, омраче́нныя печа́льми и из глубины́ серде́ц зову́щия:
Ра́дуйтеся, ри́зы ва́ша в кро́ви А́гнчей на земли́ убели́вшия; ра́дуйтеся, живота́ ве́чнаго нам хода́таицы.
Ра́дуйтеся, душ, и́щущих поко́я в милосе́рдии Бо́жии, утвержде́ние и хране́ние; ра́дуйся, Софи́е, от суеты́ мирски́я ны огражда́ющая.
Ра́дуйся, Ве́ро, доброце́нная кади́льнице, фимиа́м хвалы́ Бо́гу вознося́щая; ра́дуйся, нас гре́шных ве́рою просвеща́ющая.
Ра́дуйся, Наде́ждо, в ско́рби утеше́ние и прибе́жище на́ше; ра́дуйся, в печа́лех на́ших лучеза́рная ве́стнице избавле́ния.
Ра́дуйся, Любы́, незло́бие и кро́тость в сердца́ на́ша влива́ющая; ра́дуйся, та́инственная звездо́, от тесноты́ земны́я горе́ ны вознося́щая.
Ра́дуйся, Софи́е, му́драя и пречестна́я детоводи́тельнице; ра́дуйся, богому́драго жития́ моля́щимся ти устрои́тельнице.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 12
Благода́ть Бо́жию прия́ти сподо́бившияся, моли́те о нас, святы́я му́ченицы, Пречи́стаго Влады́ку Христа́, да ми́лостив бу́дет к нам гре́шным, с ве́рою, наде́ждою и любо́вию Ему́ Еди́ному, Го́споду и Спа́су на́шему, смире́нно пою́щим: Аллилу́иа.
И́кос 12
Пое́м ва́ша кре́пкия по́двиги, ве́рою, наде́ждею и любо́вию проникнове́нныя, почита́ем страда́ния ва́ша презе́льная, хва́лим ди́вное терпе́ние ва́ше, ублажа́ем кончи́ну, за Христа́ ва́ми ра́достно подъя́тую, велича́ем необори́мое му́жество ва́ше, святы́я му́ченицы Ве́ро, Наде́ждо и Любы́, и му́драя ма́ти Софи́е, и прославля́юще вас, взыва́ем си́це:
Ра́дуйтеся, а́ки три струи́ мо́лниины, от восто́к да́же до за́пад доброде́тельми свои́ми просия́вшия; ра́дуйтеся, фиа́ли ве́ры, наде́жды и любве́, животво́рным питие́м ду́ши на́ша напая́ющии.
Ра́дуйтеся, трие́ светоза́рнии путие́, ко престо́лу сла́вы Госпо́дни нас веду́щии; ра́дуйся, Софи́е, чад ра́ди твои́х от ли́ка святы́х похвале́нная.
Ра́дуйся, Ве́ро, цве́те ве́ры, па́че сне́га беле́йший; ра́дуйся, услажде́ние стра́ждущих.
Ра́дуйся, Наде́ждо, угнете́нных серде́ц возноше́ние; ра́дуйся, а́ки пото́к цельбоно́сный, жа́жду скорбя́щих душ утоля́ющая.
Ра́дуйся, Любы́, ве́нче из ми́ра, ра́дования и бла́гости соплете́нный; ра́дуйся, у́мная зарни́це ве́чности.
Ра́дуйся, Софи́е, же́зле си́лы, кро́тце и му́дре ча́да наказу́яй; ра́дуйся, богове́дения пресве́тлая луче́, душа́м на́шим возсиява́ющая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 13
О, святы́я и достохва́льныя му́ченицы Ве́ро, Наде́ждо и Любы́, и му́драя ма́ти Софи́е, ны́не прие́мше ма́лое сие́ моле́ние на́ше, от вся́ких ны бед, боле́зней и скорбе́й моли́твами ва́шими изба́вите, да сподо́бльшеся во Ца́рствии Небе́снем зре́ти безсме́ртнаго Го́спода Иису́са, с ва́ми вку́пе воспое́м Ему́: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
И́кос 1
А́нгели на Небеси́ ра́довахуся, доброде́тельное житие́ ва́ше зря́ще, е́же провожда́сте в чте́нии Писа́ний Боже́ственных, в труде́х, посте́, моли́тве и ми́лостыни, ма́терию ва́шею непреста́нно су́щи поуча́еми, да явите́ся о́брази живи́и трие́х богосло́вских доброде́телей, и́хже имена́ми наречены́ бы́сте. Мы же, такове́й му́дрости ма́тере ва́шея и соверше́нному благоразу́мию ва́шему дивя́щеся, благогове́йно рцем вам:
Ра́дуйтеся, единомы́сленныя сестры́, трие́м доброде́телем тезоимени́тыя; ра́дуйтеся, в повинове́нии богому́дрей ма́тери ва́шей на сте́пени соверше́нствования вше́дшия.
Ра́дуйтеся, а́ки три ра́йския ве́тви, в злове́рнем Ри́ме возра́сшия; ра́дуйся, Софи́е, дще́рем твои́м имена́ доброде́телей наре́кшая, я́же ве́щию исполня́ти научи́ла еси́.
Ра́дуйся, Ве́ро, ве́рою неви́димое, я́ко ви́димое, зре́ти нам помога́ющая; ра́дуйся, в нетле́ние облече́нная.
Ра́дуйся, Наде́ждо, наде́ждою страда́ния на́ша во юдо́ли ско́рби ослабля́ющая и в го́рняя десни́цею указу́ющая; ра́дуйся, Ца́рствие Небе́сное унасле́довавшая.
Ра́дуйся, Любы́, любо́вию Боже́ственною блаже́нство безсме́ртныя жи́зни нам открыва́ющая; ра́дуйся, благода́тию Ду́ха Свята́го осия́нная.
Ра́дуйся, Софи́е, си́есть прему́дрость, прему́дре дще́ри твоя́ воспита́вшая; ра́дуйся, в доброде́телех ве́ры, наде́жды и любве́ нас утвержда́ющая.
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
Конда́к 1
Избра́нным раба́м Го́спода Вседержи́теля, Ве́ре, Наде́жде и Любви́, и му́дрей ма́тери Софи́и, похва́льная вам пе́ния умиле́нно возно́сим. Вы же, я́ко дерзнове́ние ко Христу́ Бо́гу иму́ще, моли́тися за ны, во е́же изба́витися нам грехо́в и скорбе́й, да благода́рственно вопие́м вам:
Ра́дуйтеся, Ве́ро, Наде́ждо и Любы́, ку́пно с Софи́ею, ма́терию ва́шею прему́дрою.
